Форма входа
| Главная » Статьи » Знаменитые люди нашего края |
Мемнан ачана-влак
23-шо февраль – Россий Армийын кечыже. Ты кечын утларакшым поръен-влакым саламлат. Чынжымак, вет нуно мемнан тыныс илышнам аралат. Икшыве – влакат ача ден изаштым тиде пайрем дене саламлаш вашкат. Меат, Арын школын 3-шо классыштыже тунемше - влак, ача ден иза- влакым школышкына ужна. Программым ончылгоч ямдылыме.Эн ончычак туныктышо да ача – влак коклаште волейбол дене танасымаш лие. Кок командыжат чот шогыш гынат, ача – впак сенышыш лектыч. Умбакыже 3 - шо классыште тунемше удыр – рвезе –влак шке ачашт нерген каласкалышт, пайрем кече дене саламлышт. Теве икмыняр ача нерген теат лудын кертыда. Мыйын ачам Яковлев Сергей Кимович. Тудо Посанур ялеш шочын. Вич ияш лиймекыже Карман курык воктенысе Овдасола ялыш илаш кусненыт.Ешыштышт ныл эрге лийын, а ачамже – кумшо. Ачам Кокласола школыш тунемаш коштын. Кандаш класс деч вара, Йошкар-Оласе спорт школыш тунемаш каен. Варажым армий радамыште служитлен. Сай служитлымыж нерген тудын громотшо – влак ойлат. Кызыт ачам Кульбаш ялыш пашаш коштеш. Авам дене коктын мыйым ончен куштат. Ачам мыйым моткоч йората. Мыят ачам пагалем. Яковлев Владимир  Мыйын ачам – Сергеев Михаил Никифорович. Тудо Нуръял Корамас ялеш шочын. Кызытат туштак илена. Ачам мыйын моткоч пашаче да уста кидан. Ачам машин денат, трактор денат кудалышт мошта. Шалана гын, шке торлен мошта.Трактор праважым луымшо классыште тунеммыж годымак пуэныт, а машиналан правам налаш Волжск олашке миен. Ачам портымат чонен мошта, мукшымат онча, вольык сомылымат шукта. Урок ышташ ачам полша. Ме ачам дене келшен илена. Сергеев Константин  Мыйын ачам Чавайнур ялеш шочын. Ялыште тудым чылан Ванюш маныт.Кызыт ачамлан 47 ий. Ачамын ешыште шым йоча лийын: кок удыр да вич рвезе. Пытартыш икшывыже ачам ден Санюк изай, йыгыр пелаш шочыныт. Нуно шке ачаштым огыт пале: ачашт, мыйын кочам, самырыкак колен. Садлан ачаммытлан моткоч неле лийын.Ковайлан шым йочам йол умбак шкетланже шогалташ логалын. Ачамланат изинекак нелым , йосым чыташыже пернен. Шуко неле пашажат ачамлан логалын. Мый ачамым чаманем. Садлан ваштарешыже ом вурседал, шукшо мутымат ом каласе.Мый ачамым чотак йоратем да тиде пайрем кечын каласем: кужу умыран, пиалан, таза лий, ачаем. Семёнова Надежда  Мыйын ачам – Галкин Евгений Вениаминович. Тудо 1965-ше ий 21-ше ноябрьыште Изи Корамас ялеш шочын.Изинек пеш весела да писе лийын. Эн ондак Изи Корамас школышто, вараже Арын школышто шинчымашым поген. Школ деч вара Волжск оласе автошколышто шофёрлан тунемын. Варажым армийыште кум ий служитлен. Вет тудо мундыр Камчаткыште моряк лийын. Армий деч вара Йошкар – Оласе Политехнический институтышто механик профессийым налын шочмо кундемышкыже портылын.Чавайн лумеш колхозышто инженерын пашажым шуктен. Кызытат ачамым шукын порын шарнат. Галкин Андрей  Мыйын ачамын лумжо – Никанор. Кызыт тудлан 36 ий. Ачам кукшо капан, лопка туп-вачан. Вет тудо армий радамыште моряк лийын. Кызыт тудо Арын школышто завхоз да тренер пашам шукта. Шаланыше пукеным, устембалым, омсам ачала. Йоча- влакым ече дене кошташ туныкта, учашаш нангая. Йоча – влак ачамым пагалат.Мыят пагалем, йоратем да кугешнем. Никифорова Илга.  Мыйын ачамын лумжо Осипов Альберт Александрович. Ачам лу классым сайын тунем лектын. Тунемме жапыштыже ече дене кошташ йоратен, шуко гана икымше верым налын. Вара ачам армийыш миен толын, шофёрлан тунем лектын. Кызыт ордыж верыш пашам ышташ коштеш. Мый ачамым чот гына йоратем. Осипова Людмила  Мыйын ачам поро, шыма да ласка. Тудым ялыште Славик маныт.Ачам трактор дене кудалышташ йората.Ачам пашалан моткоч тале.Шукыж годым чодыра пашаш коштеш. Тракторжо дене пум шупшыкта. Шошо шуэшат, пасу куралаш лектеш. Васильева Валентина  Мыйын ачам - Олег Николаевич. Тудо вуйлатышын полышкалышыжлан тырша. Ачам инженер улеш. Ачам чыла пашаланат моткоч уста. Шкеак тракторымат, машинамат ачален мошта. Тыгак ачам мыйым да ака - шамычем моткоч йората. Тек ачам кужу умыран, пенгыде тазалыкан, пиалан лиеш. Сидоров Олег  А мучашлан Степанов Максимын ачажлан возымо серышыж дене пытарыме шуэш. Ош туняш шочмеке, кажне йочалан ача ден ава кулеш. Нуно мыланна тун энертыш улыт. Удыр икшыве ава деке шуман гын, эргылан ача кулеш. Ача – сурт оза, ача – пашаче кид. Ача ешыжым чын корно дене нангайыше, вудышо. Мыланна ача ден аванам пагалаш кулеш. Кертмына семын пашалан полшашак тыршаш. Тек чыла йочан ава ден ачашт лийыт.  Арын школын 3 – шо классым вуйлатыше
Васильева Олимпиада Алексеевна ямдылен. | |
| Просмотров: 10371 | Рейтинг: 5.0/4 |
| Всего комментариев: 0 | |
