Главная » Статьи » События |
Арын школышто нылле ий физкультурым туныктышо А.Степановын тунемше-влакын тазалыкыштым шуарымаште надырже нимучашдыме. 7 спорт мастерым да спорт мастерыш 12 кандидатым куштен. Ече спортым вияҥдымаште кугу пашам ыштен. Сай пашажым аклен, шуко Чап грамота, таумут, шарнымашан пӧлек дене палемденыт. Тылеч посна «20 лет Победы над Германией» (1965 ий), «За трудовое отличие» (1981ий) медаль дене палемдалтын. 2002 ийыште «Марий Эл Республикысе образованийын сулло пашаеҥже» лӱмым пуэныт. Чыла тидым шотыш налын, Анатолий Степановым шарныме лӱмеш Морко районысо Арын школышто ече дене таҥасымашым эртареныт. Ты пайремыш йолташыже да ече спортым йӧратыше-влак погыненыт. Арын школын тунемшыже-влак А.И.Степановын илыш корныж дене палдареныт. Погынышо-влакым Марий Эл Кугыжаныш Погын вуйлатышын алмаштышыже А.Иванов саламлен. «Таче кече гыч Анатолий Иванович Степановын у «илыш» корныжо тӱҥалеш», – манын Арын школын директоржо. Марий кугыжаныш университетыште физкультурым туныктышо А.Горбатоват йолташыжым порын шарналтен. Стартышке Морко, Волжск, Провой кундемла гыч ечызе-шамыч, Йошкар-Оласе Марий кугыжаныш университетын да РМТ-н студентше-влак лектыныт. Сеҥыше-шамычлан организатор-влак медальым, грамотым да шарнымашан пӧлекым кучыктеныт. Куснылшо кубок тиде ийын сеҥыше командылан, Арын школеш, кодын. Ты тӱняште нимоат курымашлык огыл. Лачак поро лӱм веле курымешлан калык чонеш кодеш. Тек Анатолий Ивановичын лӱмжат калык шӱмыштӧ курымла мучко кечыйол гай волгалтеш. А.ТИТОВ. Авторын фотожо. Биография Анатолия Ивановича Степанова Источник: http://www.mariel.org.ru/sport/5338-sharnymash-start.html | |
Просмотров: 1608
| Теги: |
Всего комментариев: 0 | |